" و جمال بيتكلم
و يصحى
و يعلم "
صلاح جاهين
اهداء :
الى جمال عبد الناصر
المنارة الشاهقة وسط ظلمة الاحزان
اشرف عمار
عن
الرئيس عبد الناصر
أيضاح :
1ـ عبد الناصر هو اعظم بطل ثورى فى تاريخنا الحديث .. و التاريخ الحديث سمتة الرئيسية هية صعود و ترسخ ثم الميل للانهيار و الزوال للنظام الرأسمالى ف العالم كلة ، و بالنسبة لنا هنا فى مصر و الدول العربية و العالم التالت فهو زمن سقوطنا اسرى التبعية للاستعمار و الامبريالية و سعينا المتواصل للخروج عليهم و الانعتاق منهم .
بدون الدخول فى مقارنات عقيمة غير مجدية ، عن عصور سابقة او ابطال تاريخيين سابقين ، فان عبد الناصر بالتحديد دا هوة اعظم بطل ثورى فى تاريخنا الحديث بلا منازع .
2ـ عبد الناصر فى رأيى ايضا هو اعظم مثقف ثورى فى تاريخنا الحديث .. و هو قد مزج الفكر بالفعل ، و كان قادر على التطور المستمر ، و على بلورة افكارة فى خضم الحوادث و التعلم و النضج ، و من ثم تعليم الناس ايضا و قيادة الجماهير .
الثقافة مش مجرد قراية كتب كتير ، و لا العلم باسماء ناس اجانب او مصطلحات اجنبية ، و لا المعرفة الواسعة بالادب او المسرح الفرنسى مثلا ، او القدرة على استدعاء عبارات شيقة ماهرة منطبقة على ما يرد من احداث و مستمدة من بطون الكتب المختلفة فى شتى العصور .
لو كل دا مش مكرس فى النهاية لتغيير الواقع و خدمة الجماهير ، لو كل دا ما كانش على تماس مع الواقع و الجماهير ، المثقف هيكون معزول و هيفقد تميزة ، او بمعنى ادق تميزة دة هيكون بلا مردود ..
الثقافة الحقيقية ، هية اللى بتطالعنا فى كلمات عبد الناصر القائد و المعلم اللى هنحاول هنا نعرض منها لمحات .
3ـ المدونة دى سيئة الحظ الى حد ما .. انا فكرت اعملها اواخر السنة اللى فاتت و كان تفكيرى متجة لانى احط فيها اللى كتبتة عن عبد الناصر على مدى العشر سنين اللى فاتوا ..
و بعدين انا كسلان من ناحية ، و انشغلت من ناحية ؛ و بعدين جت عواصف الثورة فى يناير و ما بعدة .. و ..
حسيت ان تخطيطى للامر كما كان فى الاصل ممكن يتراجع شوية ، و يؤجل شوية ، و يتقدم شكل تانى ما كانش فى ذهنى ابتداءا : انى احط نماذج و مقتطفات من خطب الرئيس .. انا دايما كنت باعتبر دى ـ الخطب ـ اهم وثائق الثورة اطلاقا ، و منبع و مصدر ثرى لفهم عبد الناصر و الناصرية و تقييمهما بشكل صحيح ..
و غرضى ببساطة ( زى ما كان غرضى بفكرة تجميع مقالاتى عن الناصرية فى مدونة ـ اللى هاؤجلها شوية ) انى ابين ارتباط عبد الناصر و الناصرية باللحظة اللراهنة و بالمستقبل ، و انى استخدم المدفعية التقيلة دى ( كلمات الرئيس و فكرة ) فى معاركنا للحاضر و المستقبل .
يمكن احد العوامل اللى حفزتنى لهذا هية الكذبة المنحطة الرايجة بشدة عن اننا بقالنا 60 سنة تحت حكم العسكر ( و دا مش صحيح و انا كتبت علية فى مدونتى عن الثورة العربية فى تعليق عن الجيش ) و عبارة سمعتها من واحد صاحبى ان الثورة دى ( ثورة 25 يناير ) هية ثورة على الثورة ( يقصد ثورة على 23 يوليو ) ـ العبارة دى مضمونها بيسرى وسطينا برضة بالفاظ و صياغات مختلفة ..
و كل دا بيهدد مسيرتنا الثورية و تطورنا الثورى .
انا مش هانشر دلوقت نصوص مقالاتى عن الناصرية اللى كان غرضى من التفكير فى تجميعها و اعادة نشرها ، الدفاع عن الناصرية و فكرة الثورة ، فى زمن الجزر الثورى ..
و دة لاننا بقينا فى زمن مد ثورى ، و اتارينا كنا عايشين اواخر لحظات الجزر اللى استمرت عقود ، و احنا مش دريانيين .. لذلك غرضى من المدونة هوة هوة لكن السلاح الان يتغير بحكم اشتداد الوتيرة الثورية ..
كلمات عبد الناصر مباشرة اهم من اى كتابات عنة الان ..
انا معرفتى قديمة بخطب الرئيس ، و من عقدين من الزمن تقريبا و انا على ألفة معاها ( مجلدات هيئة الاستعلامات الخمسة اللى نزلوا سنة 1966 ، و مجلدين الاهرام اللى نزلوا بعد وفاة الرئيس عن فترة 1967 ـ 1970 ) ، لذلك انا هانتقى هنا مما اذكرة و أثر فى او مما اجدة امامى ، ما هو مناسب لخدمة ثورتنا ( ثورة 25 يناير الللى هية امتداد ارقى لثورة 23 يولية ، و الللى هما الاتنين روافع هائلة لحياتنا و مستقبلنا كلة ) .
أواخر يونيو 2011
